عايزه أيه منى ياحلوه..؟
قصيدة عايزه أيه منى ياحلوه..؟
. عايزه أيه منى ياحلوه..؟
عايزه قلبى يغنى غنوه
أشكى فيها م الهمومْ
وارْسَمكْ صوره جميله كُلَّ يومْ. .
. تقصدى يوم م تسيبينى
ح اكتب الكلمه الحزينه
واروى شَعرى ف الجدايلْ والعيونْ
وارتوى من حُبْ مايلْ والجنونْ
وابقى بالذكرى هناكْ
وابكى ع الحلم اللى ضاعْ
وانت ف الجنَّه الملاكْ. .
. عايزه أيه منى ياحلوهْ..؟
أرتمى من بعد شوقكْ
وسط أحضانْ الفراقْ
لا ياحلوه
لو وصالكْ نارْ ح تكوينى ف ضلوعى
لا بلاشْ
لا بلاشْ
أرحمينى
ما تقوليش كلمة ودادْ
وازرعى بينا الحدودْ
قبل م تهل الجراحْ بالنواحْ
وابعدى سهم الرموشْ عن طريقى
واعذرينى. .
. عايزه أيه منى ياحلوه..؟
آه ياحلوه
لو تيجينى وتهجرينى يوم صفا
قلبى حالا يختفى
زى شمعهْ بعد عيدها بتنطفى. .
. عايزه أيه منى ياحلوه..؟
قلبى عارفْ للخداعْ مليون طريقه
بسْ نفسه مر ه واحده يشوفْ حقيقه .
لو تراعى ف يومْ مشاعرى
هى دى اللحظه البريئه
وهى دى كلَّ الحقيقه
لحظه روحى لسه بتدور عليها . .
. عايزه أيه منى ياحلوه..؟
فاهمه أيه معنى الأصيلْ..؟
ده الاصيل
وقت الجمالْ والامانْ
لما كل طيرْ بيرجعْ للمكانْ
نفس المكانْ. .
قصائد المعاناة